Alaverdi Resort

სასტუმრო ალავერდის მონასტერთან

ახალი სასტუმრო სოფელ ალავერდში საქართველოს ერთ-ერთი მთავარი ტაძრის, ათას წელზე მეტი ხნის ალავერდის მონასტრის მეზობლად აღიმართა. ის ღვინის კომპანია „ბადაგონმა“ ააშენა და ჩაფიქრებულია არა უბრალოდ ღამის გასათევად, არამედ მყუდრო თავშესაფრად, რომელშიც მონასტრის სული ცოცხლობს. მიახლოებისას მწვანე გორაკებსა და ჰორიზონტისკენ გადაჭიმულ ვენახებს ზემოთ ტაძრის სილუეტს ხედავ.

არქიტექტურა თანამედროვე სიმკაცრეს ქართულ ტრადიციასა და სამონასტრო მემკვიდრეობას უთავსებს: ღია ფერის კედლები, ხე და დიდი თაღოვანი ფანჯრები, რომლებშიც ტაძარი ჩარჩოში ჩასმულივით ჩანს. ორმოცი და ორმოცდაშვიდი კვადრატული მეტრის ნომრები კავკასიონზე, მონასტერზე ან სოფელზე გადის, ისინი ბუნებრივი მასალებით, თბილ მიწისფერ ტონებშია გაფორმებული, აივნებიდან კი ჩანს, როგორ ამოდის და ჩადის მზე ტაძრის თავზე. სხეულისა და სულისთვის აქ იოგა, მედიტაცია, პილატესი, სპა და პადელის კორტებია.

რესტორანს „სატრაპეზო“ ჰქვია, სამონასტრო სატრაპეზოს მსგავსად, სადაც ოდითგანვე თავმდაბლობითა და მადლიერებით სადილობდნენ. სამზარეულო მონასტრისა და მიმდებარე სოფლების რეცეპტებს მისდევს, მურაბებს, მწვანილს, ყველსა და თაფლს კი მისთვის ადგილობრივი მონაზვნები ძველებურად ამზადებენ. სტუმრებს „ბადაგონის“ მარანსა და ვენახებში ატარებენ, მხოლოდ სასტუმროს სტუმრებისთვის კი მონასტრის ძველ მარანს აღებენ, სადაც საუკუნეების განმავლობაში ქვევრის ღვინის ტრადიციას ინახავდნენ.