Ambassadori Kachreti

გოლფ-კურორტი კახეთში

კურორტი „ამბასადორი“ სოფელ კაჭრეთში ღვინით დაიწყო. მის ადგილას, ვენახებს შორის, ქებურიების ოჯახის ღვინის ქარხანა იდგა, რომელიც წითელ და თეთრ ღვინოებს საექსპორტოდ აწარმოებდა, და დეგუსტაციაზე ჩამოსული უცხოელი მეღვინეები და საქმოსნები ხშირად ღამეს სულ ათოთახიან სასტუმრო სახლში ათევდნენ. სტუმრები სულ უფრო მეტნი ხდებოდნენ, ოთახებს ერთმანეთის მიყოლებით აშენებდნენ, სანამ ახალი კორპუსები არ წამოიმართა.

დღეს ეს ორ შენობაში განთავსებული 182-ნომრიანი კურორტია: ძველ, ისტორიულ ნაწილში 76 ნომერია, ახალ კორპუსში 106. აქ არის ღია და დახურული აუზები, მათ შორის ოლიმპიური, ჩოგბურთის კორტები და სტადიონები, სასროლეთი, ცხენოსნობა, ბოულინგი და სამხატვრო გალერეა, ასევე სპა და ღვინის მარანი. ეს დედაქალაქთან ყველაზე ახლოს მდებარე კურორტია აღმოსავლეთის მხრიდან, თბილისამდე დაახლოებით ოთხმოცი კილომეტრია.

მეპატრონეს არც ეს ეყო და ისეთ საქმეში ჩადო ფული, რომელიც საქართველოში მანამდე არ არსებობდა: მეზობლად ოცდახუთი ჰექტარი მიწა იყიდა და გოლფის პროფესიული მოედანი ააშენა. ასე გაჩნდა კაჭრეთში ქვეყნის პირველი საერთაშორისო დონის გოლფ-კლუბი, ცხრაორმოიანი მოედნით, თვრამეტორმოიანი მინი-გოლფითა და მწვრთნელებით, ახლა კი აქ დიპლომატები ჩამოდიან და საერთაშორისო ტურნირები იმართება.